Traballando a estrutura dramática da ópera de xeito divertido

En LÓVA, o alumnado de 5º de EP xa rematou de traballar a estrutura dramática en parellas, usando viñetas para que todo fose máis visual e doado de comprender. Esta actividade permitiulles identificar claramente cada fase da historia, desde a presentación dos personaxes ata os conflitos e os desenlaces.

Finalmente, puxeron todo en común en gran grupo, compartindo ideas e observacións, o que fomentou a colaboración e a creatividade. Grazas a esta técnica, non só aprenderon a estruturar unha historia, senón tamén a expresar visualmente os momentos clave e comprender como se constrúe unha narrativa impactante.

Un xeito divertido e creativo de aprender a desenvolver unha gran historia e de ver como a ópera cobra vida! 🎬🖌️

Visita inspiradora da profe Lucía Penas

Como parte do proxecto LÓVA, os nenos e nenas de 5º de EP recibiron a visita da profe Lucía Penas, que veu falarlles sobre as profesións de relacións públicas e documentalistas.

Para explicalo, Lucía apoiouse nun exemplo moi próximo ao alumnado: a potente campaña de marketing da última tempada de Stranger Things. Foi emocionante ver como conectaron co tema!

Os nosos estudantes quedaron encantados e cheos de ideas sobre como se documenta o proceso de creación da ópera e como despois se comunica ao mundo de forma impactante. 🎬💡

Cerimonia de entrega das profesións en LÓVA

A pasada semana, o alumnado de 5º EP participou nun dos momentos máis esperados do proxecto LÓVA: a cerimonia de entrega das profesións. 

Durante o acto, cada estudante foi recibindo a súa profesión, asumindo así unha responsabilidade real dentro do proxecto: dirección, escenografía, iluminación, vestiario, comunicación, interpretación e moitas outras tarefas fundamentais para que a compañía funcione. Foi un instante cargado de nervios, ilusión e curiosidade, no que todos e todas escoitaban con atención e celebraban con aplausos cada nova asignación.

Un dos momentos máis significativos foi a sinatura do contrato emocional. A través deste xesto simbólico, o alumnado comprometeuse a desenvolver a súa profesión con responsabilidade, esforzo e entusiasmo, entendendo que o éxito da compañía depende do traballo e da colaboración de todo o grupo. Este compromiso tamén reflicte valores tan importantes como o respecto, a cooperación e a confianza entre compañeiros e compañeiras.

Entre sorrisos, aplausos e algunha que outra mirada chea de emoción, deu comezo oficialmente esta nova etapa do proxecto. A partir de agora, o alumnado traballará unido para facer realidade a súa propia ópera, aprendendo a organizarse e crear algo único entre todos. 🎭✨

Aprendendo a dirixir en equipo no proxecto LÓVA

Dentro do proxecto LÓVA, os nenos e nenas recibiron a visita de Gabriel, pai de Ohana, que participou nunha sesión moi enriquecedora e chea de aprendizaxes.

Durante o encontro, falounos da súa experiencia como director e explicou como se organiza e se dirixe unha empresa, facendo especial fincapé na importancia de saber traballar en equipo, ter ganas, iniciativa e motivación, e actuar sempre desde a empatía e o respecto ás persoas.

O alumnado puido facer preguntas, reflexionar e relacionar todo o aprendido co seu propio traballo dentro do proxecto LÓVA, comprendendo mellor o valor de cada unha das profesións da compañía.

Moitas grazas, Gabriel, por compartir o teu tempo e a túa experiencia con nós e por axudar a facer deste proxecto unha vivencia aínda máis significativa 💙✨

As profesións de LÓVA

Dentro do proxecto LÓVA (A Ópera, un Vehículo de Aprendizaxe), o alumnado de 5º de Educación Primaria iniciou un proceso de coñecemento e exploración de todo o traballo que hai detrás dunha produción escénica.

Ao longo das primeiras sesións, traballaron as distintas profesións implicadas nunha función, aprendendo cal é o papel de cada unha antes, durante e ao remate do espectáculo, así como a importancia da coordinación e do traballo en equipo. Iluminadores, intérpretes, responsables de relacións públicas, vestiario, peiteado e maquillaxe, dirección...

Ademais, realizaron unha visita ao salón de actos do centro co obxectivo de familiarizarse co espazo no que desenvolverán o proxecto ao longo dos vindeiros meses. Durante esta visita puideron coñecer o escenario, a distribución do espazo e imaxinar como será o seu propio traballo artístico.

Este proxecto permitirá ao alumnado desenvolver competencias artísticas, comunicativas e sociais, fomentando a creatividade, a responsabilidade e a cooperación.🎶

Proxecto "A senda das lendas"

O alumnado de 5º e 6º de Educación Primaria participou nun enriquecedor proxecto de creación literaria na materia de Lingua Galega, titulado “A senda das lendas”.

Durante este traballo, achegáronse ao xénero da lenda, analizando as características que toda lenda debe ter: personaxes, espazos, elementos marabillosos e a transmisión oral da tradición popular. Ademais, leron e analizaron con atención a coñecida lenda da Serea das Mirandas, parte da tradición eumesa, que lles serviu de inspiración.

A partir deste proceso, o alumnado creou as súas propias lendas, demostrando unha grande creatividade e un fondo respecto pola nosa cultura e pola nosa lingua.

Como peche do proxecto, elaboraron un libro feito a man, no que recolleron todas as historias creadas, convertendo o traballo nun produto final único e cheo de valor artístico e literario. 📖✨

Parabéns polo excelente traballo realizado!

Unha viaxe especial

Na materia de Lingua Galega, o alumnado de 5º de Primaria realizou unha presentación oral sobre unha viaxe especial. 

Primeiro organizaron as súas ideas por escrito sobre o papel e, despois, elaboraron unha presentación en Canva como apoio visual. Finalmente, expuxeron o seu traballo de maneira oral diante do resto da clase, practicando a expresión oral, a organización das ideas e o uso de ferramentas dixitais. 

Unha actividade moi completa e un gran traballo por parte do alumnado.